पाँच दिने कार्यालय व्यवस्थापन तालिम सम्पन्‍न

धरान नगरपालिका स्थानीय शासन तथा सामुदायिक विकास कार्यक्रम अन्तर्गत नगरपालिका क्षमता विकास योजना २०६६ अन्तर्गत यस आ.व. २०६८/०६९ मा नगरपालिका कर्मचारीहरूको क्षमता विकासको लागि कार्यालय व्यवस्थापन सम्बन्धी पाँच दिने तालिम मिति २०६८ चैत्र १३ गते देखि १७ गते सम्म सम्पन्न गरियो ।

तालिम कार्यक्रमको सहजिकरण नगर विकास प्रशिक्षण केन्द्रका प्रशिक्षकद्वय जयकृष्ण श्रेष्‍ठ र हरी कृष्ण कोइरालाले गर्नु भएको थियो भने नगरपालिका कार्यकारी अधिकृत राजेन्द्र कुमार पौडेल तथा नगरपालिकाका कानुनी सल्लाहकार शिवकुमार भण्डारीले पनि सहजिकरणमा सहयोग गर्नु भएको थियो । कार्यक्रममा नगरपालिकाको विभिन्न शाखा, उपशाखा, एकाइ तथा वडा कार्यालय समेतबाट गरी जम्मा २० जना कर्मचारीहरूको सहभागीता रहेको थियो ।

कार्यक्रममा कार्यालय व्यवस्थापन भित्रका पत्र दर्ता, चलानी, फाईलिङ्ग प्रक्रिया, टिप्पणी, सुशासन, नेतृत्व विकास, द्वन्द्व व्यवस्थापन, वार्ता तथा मध्यस्थताको सीप, सूचनाको हक, प्रस्ताव तथा प्रतिवेदन लेखन, सरजमिन तथा सिफारिस मुचुल्का जस्ता कार्यालय व्यवस्थापनमा प्रत्यक्ष सरोकार राख्‍ने विषयवस्तुहरू समेटिएको थियो । तालिम कार्यक्रमले धरान नगरपालिका कार्यालयको व्यवस्थापन कार्यलाई चुस्त दुरुस्त बनाउन सहयोग गरी नगरवासीहरूमा छिटो छरितो सेवा प्रवाह गर्ने नगरपालिकाको उद्देश्यमा सहयोग पुर्‌याउनु यस कार्यक्रमको उद्देश्य रहेको थियो ।

उपभोक्ता समितिसँग अभिमुखीकरण कार्यक्रम सम्पन्‍न

नगरपालिका अनुदान सञ्चालन कार्यविधि २०६७ अन्तर्गत यस आ.व. २०६८/०६९ मा सम्झौता भएका योजनाहरू मध्ये १५ वटा उपभोक्ता समितिका पदाधिकारीहरू (अध्यक्ष सचिव र कोषाध्यक्ष) सँग एक दिने उपभोक्ता समितिसँग अभिमुखीकरण तथा अन्तरक्रिया कार्यक्रम मिति २०६८/१२/८ गते धरान नगरपालिका क्षेत्रीय अध्ययन केन्द्रमा सम्पन्न गरियो ।

कार्यक्रममा धरान नगर क्षेत्रका विभिन्न वडाका १५ वटा निर्माण उपभोक्ता समितिबाट जम्मा ४५ जना समिति पदाधिकारिहरूको सहभागीता रहेको थियो । उक्त तालिमको लागि नगरपालिकाको तर्फबाट सहजकर्ताको रूपमा नगरपालिका इन्जिनियर-राजु पोखरेल, प्रशासकीय अधिकृत-गणेश प्रसाद खतिवडा, आन्तरिक लेखा परीक्षण अधिकृत-रमेश कुमार शाह, नगरपालिका कानुनी सहायक-राम कुमार राई, योजना सहायक-किरण भूजेल तथा नगरपालिका सहायक सहजकर्ता पूर्णकला राईद्वारा कार्यक्रममा सहजिकरण गरिएको थियो।

कार्यक्रममा नगरपालिका थप अनुदान, उपभोक्ता समिति सम्बन्धी कानुनी व्यवस्था, उपभोक्ता समितिको काम, कर्तव्य र अधिकार, योजना सम्झौता प्रक्रिया, पेस्की निकासा प्रक्रिया, भुक्तानी प्रक्रिया, सामाजिक तथा सार्वजनिक तथा सामाजिक परीक्षण, योजना हस्तान्तरण तथा योजना गत मापदण्डका कुराहरू तथा समग्रमा योजना निर्माण तथा व्यवस्थापनको पक्षमा अन्तरक्रिया तथा प्रस्तुति गरिएको थियो । उक्त अभिमुखीकरण पश्चात् उपभोक्ता समितिका पदाधिकारीहरूलाई आयोजना कार्यान्वयन सम्बन्धमा सहज वातावरण बन्ने कुरामा विश्वस्त हुनुभएको छ ।

धरान नगरपालिकाको समावेशी तथा लक्षित वर्गको कार्यक्रम विषयक सार्वजनिक सुनुवाइ कार्यक्रम सम्पन्न

यही मिति २०६८ माघ ९ गते सोमवारका दिन धरान नगरपालिकाको प्राङ्गणमा दिनको १ बजे देखि "धरान नगरपालिकाको समावेशी तथा लक्षित वर्गको कार्यक्रम" विषयक सार्वजनिक सुनुवाइ कार्यक्रम सम्पन्न भएको छ ।

नगरपालिकाका कार्यकारी अधिकृत श्री राजेन्द्रकुमार पौडेलको अध्यक्षतामा सम्पन्न उक्त कार्यक्रममा राजनीतिक दलका प्रतिनिधिहरु, इलाका प्रशासन कार्यालयका प्रमुख, भू.पू. मेयर तथा उपमेयर, उद्योग बाणिज्य संघका अध्यक्ष, विभिन्न संघसंस्थाका प्रतिनिधि, नागरिक समाज लगायत नगरवासीहरूको समेत उपस्थिति रहेको थियो ।

कार्यक्रमको सहजीकरण भवानी बराल र महेश श्रेष्ठले गर्नु भएको थियो भने कार्यक्रमको प्रतिवेदन तयारी तथा प्रस्तुती कार्यक्रममा मोडुरेटर गोपाल देवानले गर्नु भएको थियो । मोडुरेटरले आफ्नो प्रस्तुतीमा धरान नगरपालिकाको समावेशी तथा लक्षित वर्गको कार्यक्रम विषयमा नगरपालिकाको नीति, कार्यक्रम तथा हालको अवस्थाको बारेमा विस्तृत प्रस्तुती गर्नु भएको थियो । उक्त प्रस्तुति पश्चात् सहभागीहरूबाट उठेका विभिन्न जिज्ञासा तथा सुझावलाई टिपोट गरी लिपिबद्ध गरिनुका साथै कार्यकारी अधिकृत लगायत सम्बन्धित शाखा प्रमुखबाट स्पष्ट पारिएको थियो ।

यस सार्वजनिक सुनुवाइ कार्यक्रममा प्राप्त भएका सुझाव अनुरोध तथा आग्रहहरूको आगामी नगर परिषद् तथा नगरपालिका बोर्डहरू मार्फत सम्बोधन तथा सुधार गर्दै लैजाने समेत निर्णय गर्दै उक्त कार्यक्रम बेलुका ६ बजे सम्पन्न भएको थियो ।

भूकम्प प्रतिरोधी भवन निर्माण सम्बन्धी तिन दिने तालिम कार्यक्रम सम्पन्न

नगरपालिका क्षमता विकास योजना अन्तर्गत निर्माणकर्मी तथा प्राविधिकहरूलाई भूकम्प प्रतिरोधी भवन निर्माण सम्बन्धी तिन दिने तालिम कार्यक्रम २ चरणमा सम्पन्न गरिएको छ ।

पहिलो चरणमा मिति २०६८ माघ ३ गते देखि ५ गते सम्म (३ दिने) क्यूपेक नेपालसँगको सहकार्यमा ४५ जना निर्माणकर्मी तथा प्राविधिकहरूलाई तालिम प्रदान गरिएको थियो भने दोस्रो चरणमा पुन: मिति २०६८ माघ १७ गते देखि १९ गते सम्म (३ दिने) स्थानीय भवन निर्माण व्यवसायी संघको सहकार्यमा जम्मा ५० जना निर्माणकर्मीहरू तथा प्राविधिकहरूलाई तालिम प्रदान गरिएको थियो ।

धरान नगरपालिका कार्यालय भवनमा सम्पन्न उक्त तालिम कार्यक्रमको उद्देश्य धरान नगरपालिकाले २०६४ साल देखि लागू गर्दै आइरहेको भवन संहितालाई प्रभावकारी कार्यान्वयनको लागि दक्ष निर्माणकर्मीको उत्पादन गर्नु तथा भूकम्प प्रतिरोधी भवन निर्माणको लागि प्रोत्साहन गर्नु रहेको छ ।

चौधौं राष्ट्रिय भूकम्प सुरक्षा दिवस भव्यताका साथ सम्पन्न

धरान नगरपालिकाको आयोजना क्यूपेक नेपाल, सेक नेपाल तथा स्थानीय भवन निर्माण व्यवसायी निर्माण संघको सहयोगमा चौधौं राष्ट्रिय भूकम्प सुरक्षा दिवस मिति २०६८/१०/०२ गते भव्यताको साथमा मनाइएको छ ।धरान नगरपालिकाको प्राङ्गणमा भूकम्प गएको वेलामा गर्नु पर्ने पूर्व अध्यास गरि शुरु भएको र्‍याली भानु चौकमा पुगेर भूकम्प प्रतिरोधी भवन निर्माण सम्बन्धी मानिसको हातेसाङ्लो निर्माण गरि भूकम्प प्रतिरोधी भवन निर्माण सम्बन्धी एक्यबद्धता जनाउँदै पहिलो चरणको सभा विसर्जन गरिएको थियो । दोस्रो चरणमा पुन: भानु चौकमा बेलुकी ५:३० नगरपालिकाका कर्मचारी तथा प्रतिनिधिहरू, सहयोगी संस्था प्रतिनिधिहरू, नगरवासी तथा सरोकारवालाहरू तथा पत्रकारहरू समेतको भेलाले २०४५ साल भदौ ५ गते गएको भूकम्पले धरानमा ११६ जनाको ज्यान गएको तीतो सम्झनामा ११६ वटा दिप प्रज्वलन गरी यस राष्ट्रिय भूकम्प सुरक्षा दिवस कार्यक्रमको समापन गरियो ।

चौधौं राष्ट्रिय भूकम्प सुरक्षा दिवसलाई भव्यताका साथ मनाउने सिलसिलामा धरान नगरपालिकाको आयोजना तथा स्थानीय भवन निर्माण व्यवसायी संघ धरानको सहयोगमा 2068 माघ ४ गते रेलवे चौकमा 5 गते मंगलबारे चौकमा र 6 गते गणेशमान चौकमा भूकम्प सम्बन्धी चेतना मूलक डकुमेन्ट्री प्रदर्शन गरिएको थियो । त्यसै गरी क्यूपेक नेपालको सहयोगमा 2068 माघ 10 गते श्याम चौक र 11 गते बरगाछी चौकमा उक्त डकुमेन्ट्री प्रदर्शन गरिएको थियो । डकुमेन्ट्रीमा 2045 सालमा गएको भूकम्पले धरानमा गरेको क्षति, सन् 2005 मा पाकिस्तानमा गएको भूकम्पले गरेको क्षति, भूकम्प प्रतिरोधी भवन र सामान्य भवनको भूकम्पीय धक्काको सहन गर्न सक्ने क्षमताको जाँच गरिएको नमुनाको  प्रदर्शनीका साथै पर्यटन वर्ष 2011 का लागि नेपाल पर्यटन बोर्डबाट तयार गरिएको प्रवर्द्धनात्मक डकुमेन्ट्री समेत प्रदर्शन गरिएको थियो ।

प्रतियोगितात्मक लिखित परीक्षाको विज्ञापन

दर्खास्त फाराम (Download)

सामग्रीहरुका लागि वेबसाइटहरु

लोकसेवा आयोग
स्थानीय विकास मन्त्रालय
LGCDP कार्यक्रम

सार्वजनिक सुनुवाइ कार्यक्रम सम्बन्धी सूचना

धरान नगरपालिका कार्यालय
सुनसरी

सार्वजनिक सुनुवाइ कार्यक्रम सम्बन्धी सूचना

यही मिति 2068 माघ 9 गते सोमवारका दिन धरान नगरपालिकाको प्राङ्गणमा दिनको १ बजे देखि "धरान नगरपालिकाको समावेशी तथा लक्षित वर्गको कार्यक्रम" विषयक सार्वजनिक सुनुवाइ कार्यक्रम सञ्चालन गरिने भएको हुँदा उक्त कार्यक्रममा सम्पूर्ण नगरवासी, उपभोक्ता समितिका पदाधिकारी, गैरसरकारी तथा सामुदायिक संस्थाका प्रतिनिधि, विकास साझेदार कार्यालयका प्रतिनिधि, नागरिक मञ्चका प्रतिनिधि, बर्हिगमन अभिमत फाराम भर्ने प्रतिनिधिहरू लगायत सरोकारवाला सम्पूर्णलाई उपस्थितिका लागि हार्दिक अनुरोध छ ।

सूचना शाखा